Wednesday, November 11, 2009

जिन्दगीको अपरिभाषित परिभाषा


शिव प्रका


जति सोचे पनि
केही सोच्नै नसकिए जस्तै
गर्दा गर्दै पनि
केही गर्नै नसकिए जस्तै
जति हेरिरहे पनि
कतै केही नखेखिए जस्तै
जति खोजे पनि
कहीँ केही नभेटिए जस्तै
केही नहराए पनि
सधै केही हराए जस्तै
केही नपाउँदा पनि
कति धेरै पाए जस्तै
सधैं पाए पनि
कहिल्यै केही नपाए जस्तै
हुँदा हुँदै पनि
सधैं केही नभए जस्तै
केही नहुँदा पनि
धेरै भए जस्तै
जति हिँडे पनि
गन्तव्य कहिल्ये नभेटिए जस्तै
संसार देख्दा देख्दै
पनि
आफैंले आफैंलाई नदेखिए जस्तै
उपस्थिति हुँदा हुँदै
पनि
शून्यतामा हराए जस्तै
जीवन छँदा छँदै
पनि
जीवन्तता नभए जस्तै
जति लडे पनि
कहिल्यै नजितिने जीवनयुद्ध जस्तै
यस्तै यस्तै रहेछ जिन्दगी
बन्दाकोभीको पत्रै पत्र जस्तै
उक्काउँदै गयो
अन्त्यमा केही नभए जस्तै
अपरिभाषित परिभाषा बोकेको जिन्दगी
जिउँदा जिउँदै
पनि
जिन्दगी जिउनै नपाए जस्तै ।
(अश्रृंगार कविता अभियान ……) बोस्टन, अमेरिका ।

2 comments:

  1. सिधै मनलाई छोयो यो कविताले त । अनुमति पाउँ मैले त कम्प्यूटरमै सेभ गरेर राखेँ । साह्रै मन छोयो,के गर्नु । धेरै धेरै धन्यवाद है । यति मीठो कविता पढ्ने मौका दिनु भएकोमा ।

    ReplyDelete
  2. साँचै तपाईंले मेरो मनको कुरा तपाईंको कवितामा ब्यक्त गरिदिनु भयो , त्यही मन उडिरहेको अवस्थामा मैले पनि एउटा रचना त गरे तर तपाईंको चाँही भावना उत्कृष्ट लाग्यो .. धन्यवाद सुन्दर कविताको लागि !

    ReplyDelete

यहाँको स्वस्थ प्रतिकृया यो नेपाली मनका लागि सधैं स्वागत योग्य हुनेछ । धन्यवाद !