Sunday, January 16, 2011

नग्न सत्य !

शिव प्रकाश 
लुगाले छोपेको छ 
तर अनुहारले देखाइरहेछ 
के अनुहारमा तिमीले लुगा लाउन बिर्सियौ ?
नबोले नि त्यो मुख 
बोलिरहेछन् ती आँखा 
के आँखामा तिमीले पट्टी लाउन बिर्सियौ ? 
नभए नि तिम्रा सामू 
भित्ता थिए ओरिपरी 
के ती भित्ताका तिमीले कान थुन्न बिर्सियौ ?
नदेखे नि मैले केही 
हेरिरहेथ्यो अँध्यारोले 
के त्यो अँध्यारोका तिमीले  आँखा फुटाउन बिर्सियौ ? 
लुकाए नि सबैसामू 
 देख्छ कसै न कसैले तिम्रो त्यो नग्नरुप
के हरेक रात तिमीले कसैसामू 
आफूलाई नङ्ग्याएको बिर्सियौ ? 
उस्तै हो त्यो सत्य, तिम्रो नग्नता जस्तै 
उस्तै हुन् झूठका ती हजार आवरण 
तिम्रा तिनै लुगा जस्तै 
जति छोप्न खोज्छौ
उति उदाङ्गिन्छ त्यो तिमी आफू जस्तै 
भन- यो सत्यलाई तिमीले फेरी किन बिर्सियौ ?

(अश्रृंगार कविता अभियान) 
बोस्टन अमेरिका । जनवरी १६, २०११ ।

No comments:

Post a Comment

यहाँको स्वस्थ प्रतिकृया यो नेपाली मनका लागि सधैं स्वागत योग्य हुनेछ । धन्यवाद !